李小龍嘅名字家傳戶曉，佢拍過嘅影視作品同樣大受歡迎。七十年代初李小龍先拍《唐山大兄》，票房達到破紀錄320萬，而紀錄係用嚟打破嘅，1972嘅《猛龍過江》同《精武門》嘅票房超越《唐山大兄》，分別雄踞當年票房嘅冠亞軍，認真威到盡。

話說《猛龍過江》當年12月30日於香港上映，根據資料套戲嘅票房高達530萬，比《精武門》多咗成百萬之餘，仲成為第一部衝破500萬票房大關、打破亞洲票房紀錄嘅電影。530萬票房有幾勁？有報道話當年美孚新邨一期最細嘅一房戶買入價係三萬蚊多啲，計一計數，《猛龍過江》可以媲美今時今日票房過億嘅電影。

由李小龍執導嘅《猛龍過江》前前後後用咗八個月先完成，同當年嘅「邵氏佳片」相比，足足多咗一倍時間。套戲最精彩嘅一幕，要數李小龍於羅馬鬥獸場同空手道世界冠軍羅禮士對打嘅場面，除咗拳腳相加嘅精彩對戰，嗰幕仲係遠赴意大利拍攝，再混合棚景而製成，同李小龍嘅功夫一樣，真材實料。不過數到個人喜好，阿史就對李小龍凌空飛踢燈泡一幕最深刻，齋難度分已經贏曬。唔知大家又中意邊一幕？

圖片嚟自網絡。