其實圍村唔係新界獨有，香港九龍其實仲有一條圍村存在，呢條就係位於九龍新蒲崗嘅衙前圍村。

衙前圍又名「慶有餘村」，係由吳、李、陳三姓族人合建嘅圍村，開基祖分別係吳成達、李成規同陳朝賢，三人本來原居東莞，14世紀末就移居九龍城侯王廟附近，15世紀初遷至衙前圍嘅現址。呢條圍村同新界其他圍村唔同，條村係無圍牆，只係由村屋的外牆相連成牆。由於新蒲崗以前係臨海地區，衙前圍嘅村民大多以捕魚為業，所以村中有間天后廟。

不過，隨著社會發展，好多原居民都搬離衙前圍，好多外姓人入圍居住，仲擁有物業業權。由於衙前圍位處市區，所以八十年代開始有地產商開始收購圍內物業業，收購成功後就將古屋拆毁，所以依家去到圍內非常荒涼同破落。

既然係圍村，咁衙前圍嘅原居民有無丁權呢？答案係無嘅。因為當年九龍地區係割讓俾英國，而新界就係租借，所以1910年訂立嘅《新界條例》規定新界原居民之遺產承繼權依循傳統習俗，當中就唔包括衙前圍在內嘅九龍地區嘅原居民。

尋日睇新聞，話呢條市區圍村最後响星期一清拆。一條有幾百年歷史嘅圍村，本應係無價寶，但香港社會發展太快，土地太價錢，人太現實，先會有衙前圍嘅悲歌。

圖片來源：阿史