「日頭猛做，到依家輕鬆吓」，句歌詞係咪好熟呢~噚日講到TVB喺51年前，即係1967年11月19日開台，當年開台之後第二日，長壽綜藝節目《歡樂今宵》亦都開播，一直做到1994年10月，做咗足足6,613集咁多，仲一度打破埋最長壽電視節目嘅世界紀錄添。

據講，TVB首任總經理Colin Bendall希望喺香港製作類似澳洲嘅節目《In Melbourne Tonight》，當時只有21歲嘅電影製作人蔡和平用咗5個月時間，觀察香港人嘅生活文化，最後構思出《歡樂今宵》呢個現場直播節目，內容包括歌唱、舞蹈、話劇、遊戲等。到咗1971年11月，《歡樂今宵》更開始彩色廣播，成為香港首個以彩色製作嘅電視節目。

其實有唔少著名演員上過《歡樂今宵》，早期包括梁醒波、沈殿霞、汪明荃等，唔少TVB自家培訓嘅演員，好似劉德華、梁朝偉、周潤發、吳君如、周星馳等都曾經長期喺節目演出，而李小龍亦曾經於《歡樂今宵》亮相。除咗紅星助陣，《歡樂今宵》亦成日舉行慈善籌款活動，包括大部份香港人睇過嘅《歡樂滿東華》。

《歡樂今宵》喺80年代後期收視開始持續下降，最終喺1994年10月7日停播，雖然TVB後來都有斷斷續續播過《歡樂今宵》，但反應都係麻麻，受歡迎程度大不如前。

圖片嚟自網絡