袁崇煥呢位明代廣東人名將，萬曆四十七年中進士，不過佢就去咗兵部做官，成為咗明末鎮守邊關嘅抗金（後金）名將。佢曾經參與過寧遠之戰、寧錦之戰等戰役，呢兩場戰役仲分別打贏努爾哈赤同皇太極。不過，據《明史》所載，明思宗中咗皇太極嘅反間計，誤信袁崇煥同皇太極密有成約，袁崇煥最終被判凌遲處死。

呢位明末名將，一直以來都被譽愛國名將。之不過，佢嘅一生其實充滿爭議，令後世人對佢嘅討論不絕。老實講，如果將佢嘅事逐件講，可能講到出年都未講完，阿史就攞其中兩個爭議同史友們討論下。第一個就係明思宗殺佢係咪真係中咗皇太極反間計。後世有一個觀點就話明思宗唔係中反間計殺咗袁崇煥，因為明思宗由捉咗袁崇煥到下令處死佢隔咗成八個月，如果唔係查清楚都唔會賜條罪俾佢。所以有一個講法就係明思宗殺袁崇煥係因為佢响邊關名氣太大，有擁兵之嫌，特別係佢殺咗毛文龍，先斬後奏，明思宗自然唔可以容佢繼續亂咁嚟，最後置佢於死地都不足為奇喎。

另一個爭議就係點解清廷對袁崇煥呢位抗金名將唔單止無俾負評，仲稱許有加。後嚟有人就話呢個純粹係清廷借袁崇煥嘅忠勇嚟凸顯明思宗嘅昏庸，藉此明示暗示滿清統治天下嘅合理性。另外就係講到袁崇煥好有才能，咁努爾哈赤同皇太極打唔贏就會合理啲喇！

聽落又好似似層層，唔知史友們點睇呢？