今個星期講開無綫，就不如講埋六叔邵逸夫同方逸華啦。邵逸夫 1907年喺上海出世，响八兄弟姊妹之中排第六，所以啲人就叫佢做「邵老六」或者尊稱佢做「六叔」。邵逸夫中學畢業之後，就去新加坡加入哥哥成立嘅天一影片公司，開始對電影業產生興趣。後來邵逸夫1958年嚟香港成立邵氏兄弟公司，喺清水灣買地起邵氏影城，拍咗過千部電影。到咗60年代，邵逸夫聯同商人利希慎嘅仔利孝和、余仁生老闆余東璇個仔余經緯同一啲英資企業組成財團，投得無綫電視廣播牌照，成立電視廣播有限公司（TVB）。

至於方逸華，佢喺1952年邂逅邵逸夫，當年只得18歲嘅佢第一次登台，就令邵逸夫一見傾心，展開猛烈追求，但二人關係一直都無對外承認過。方逸華喺1969年加入邵氏兄弟採購部，成為邵逸夫得力助手，去到70年代仲做埋電影監製、80年代成為無綫董事，係邵氏同無綫嘅關鍵人物。華麗背後，邵逸夫其實有元配夫人黃美珍，而黃美珍一直都知道方逸華嘅存在，有報道就話兩個女人一直都客客氣氣咁相處。到咗1987年，85歲嘅黃美珍喺洛杉磯病逝，正當其他人都以為邵逸夫會娶方逸華，但邵逸夫當時就話無呢個打算。

事隔十年，到咗1997年，90歲高齡嘅邵逸夫出乎意料地喺美國拉斯維加斯同方逸華登記結婚，當時邵逸夫就話係為咗俾名份方逸華，亦都係為咗確保佢日後嘅幸福。最特別嘅係，無論婚前定婚後，邵逸夫同方逸華都未有同居，兩個各有各住，方逸華只會喺星期日去距離5分鐘路程嘅邵逸夫屋企食飯。最後，邵逸夫同方逸華先後喺2014年同2017年離世。

圖片嚟自網絡。