沙中線工程嘅土瓜灣站地盤早前發掘出宋朝古井及文物，證明土瓜灣歷史悠久，早到宋代已經有人住。咁大家又知唔知，土瓜灣嗰名同番薯、沙葛，以及一個消失嘅小島有關？

根據資料，土瓜灣舊時嘅形狀好似龍吐珠咁，而粒珠嘅位置係一個無名小島，後嚟用島上嘅海心廟命名，稱為海心島。不過海心島1971年因為填海，同陸地相連而不復存在，成為依家海心公園嘅所在地。而有講法話，海心島嘅形狀好似番薯，所以嗰地方被命名為「土瓜」灣。

另外一種講法話，土瓜灣以往係土瓜灣村，位處浙江街北邊，而土瓜灣就係以條村種嘅沙葛命名。不過，有百幾年前嘅地圖曾經標註土瓜灣為「土家灣」，好似同上面講嘅兩種說法唔同，唔知大家又點睇呢？

圖為當年嘅海心島。網絡圖片