阿史去pantry斟水果陣聽到兩個女同事討論緊「湊仔經」，佢哋竟然將自己個小朋友叫做「塞豆窿」，阿史諗起都覺得心寒。

唔少人都中意叫小朋友做「塞豆窿」，但其實呢個名嘅背後有段幾得人驚嘅故事。相傳以前喺洪水為患嘅地方，防洪嘅堤壩經常決堤引起氾濫，果啲迷信嘅人就會將小朋友塞入個堤壩嘅排水口入面，以防止洪水氾濫。呢個排水口又叫做豆窿，佢哋以為將小朋友活活咁塞入豆窿裡面就可以令洪水倒退，殊不知呢個做法荒謬殘忍至極。

另一個講法就話「塞豆窿」其實係「塞竇窿」，「竇」係指漁塘連接河道嘅閘口，個閘口唔大，通常得一兩尺咁闊。有時漁民放水果陣，會發覺去水去得唔順暢，原因好有可能係因為有誤墮漁塘嘅小朋友屍體，塞住咗個「竇」。所以，塞竇窿就引申為小朋友嘅別稱。無論係邊個說法都好，塞豆窿始終有負面、詛咒之意，無咩事都唔好咁稱呼佢哋喇。