孫中山嘅事跡大家都知唔少，為咗革命事業，佢仲差啲連命仔都無。話說喺1896年10月，英國倫敦嘅清公使館誘捕孫中山，準備將佢秘密運返中國處死，此事曾震驚英國，究竟詳情係點？
當孫中山前往英國倫敦探望老師康德黎途中，清公使館官員鄧延鏗以廣東老鄉嘅身份誘騙孫中山入公使館喝茶，之後將佢關押喺三樓一個靠窗嘅房仔。當時清政府通緝緊孫中山，公使館為咗向清政府邀功，不惜花費7000英鎊向英國輪船公司租咗艘輪船，仲訂製咗個大木籠，諗住秘密運孫中山返中國。
被囚禁嘅孫中山與世隔絕，唯有寫紙仔，包住一粒硬幣或者直接揸埋一嚿丟出街，希望可以有人執到，將佢被捕嘅消息通知康德黎。不過，佢嘅紙仔一直無被發現。最後，孫中山得到公使館英籍工人同女管家嘅同情、幫助，先得以傳信俾康德黎。康德黎收到求救訊息之後，即刻同孫中山另一位好友孟生奔走營救，佢哋多次去倫敦警局同英國外交部，要求英政府交涉，仲去公使館要求放人，甚至向倫敦刑事法院指控清公使館違反「人身保護法」，都失敗而回。
不過，皇天不負有心人，英國警方同意派警員監視清公使館，以防孫中山被偷運出公使館。而孫中山被禁嘅消息亦都被《地球報》嘅記者聽到，之後更被英國各大報章報道，輿論一致同情孫中山，譴責公使館嘅做法。最後，由英國首相兼外交大臣梳士巴利出面，要求清公使館依照國際法同國際慣例立即釋放孫中山，孫中山先得以獲釋。依件事之後，「孫中山」呢個名喺國際間聲名大噪，為佢日後革命成功奠下基礎。
圖為《孫中山倫敦蒙難》畫作。網上圖片