前排金庸逝世，除咗令人諗起佢所寫嘅小說，亦令阿史諗起另一位已經離世、「香港四大才子」之一嘅黃霑。

「香港四大才子」才情各異、各有所長，金庸寫武俠、倪匡寫科幻、蔡瀾寫美食，而黃霑就最擅張作曲填詞。黃霑喺60年代開始作曲填詞，寫過唔少耳熟能詳嘅作品，就好似溫拿主唱嘅《L-O-V-E》、羅文主唱嘅《獅子山下》、電影《笑傲江湖》主題曲《滄海一聲笑》等，而《上海灘》同埋迪士尼兒歌《世界真細小》嘅詞都係出自黃霑手筆㗎！不過講到阿史嘅最愛，梗係要講講鄧麗君嘅《忘記他》: 忘記他，等於忘掉了一切……銘心刻骨來永久記住,從此永無盡期。歌詞寫出刻骨銘心嘅感覺之餘，再由鄧麗君把靚聲唱出嚟，簡直一絕，首歌仲攞埋第四屆十大中文金曲嘅最佳中文（流行）歌曲獎添，勁呀！

除咗作曲填詞，黃霑亦都參與唔少電影工作，佢自編自導拍過《天堂》，亦演過《唐伯虎點秋香》嘅華太師、《逃學威龍2》嘅王牧師，可以話係多才多藝。可惜嘅係，黃霑2004年11月24日肺癌逝世，終年63歲。

圖片嚟自網絡