今晚係無綫嘅萬千星輝頒獎典禮，記得响羅家良、古天樂、吳啟華等演員擔任電視劇男主角嘅年代，電視真係好好睇，而回想返當年嘅頒獎典禮，有獎攞嘅自然值得高興，不過有部份男演員演得好好，但係同視帝獎項無緣，其中一個就係江華。

江華參加過新秀，大唱哥哥張國榮嘅《風繼續吹》，不過佢入咗30名之後就宣布退出，當年冠軍係張衛健。之後江華加入亞視嘅藝員訓練班，拍過《郎心如鐵》、《我和春天有個約會》等。除咗劇集，佢都有拍電影，1990年更憑住《但願人長久》奪得金像獎最佳新演員。

而跳槽過檔之後，江華繼續發光發熱，《尋秦記》、《楚漢驕雄》、《楊貴妃》、《九五至尊》、《無業樓民》等都係代表作，遊走於嫪毐、項羽、唐玄宗、雍正等角色之間毫無違和感，要氣勢時有氣勢，無論忠定奸、貴族定小男人，全部拿捏得恰到好處。

據講拍《西遊記》嗰陣，四大主角都會爆肚，飾演孫悟空嘅張衛健話，「唐僧」江華一接唔到下一句，就會走埋一邊狂唸阿彌陀佛，而飾演沙僧嘅麥包就彈嚟彈去扮唔知點算好，可見幾個演員都轉數好快，擦出唔少火花。

江華2003年憑《九五至尊》奪得無綫我最喜愛角色獎，事業攀上高峯，不過同屆嘅我最喜愛男主角由《戇夫成龍》嘅郭晉安奪得，令江華無緣視帝。兩年後江華拍完《鳳舞香羅》後離開無綫，後嚟因腰患而患上情緒病，報道話佢轉行做保險，係觀眾嘅一大損失。

圖片嚟自網絡。