唔知大家仲記唔記得以前有個節目嘅主持人，成日話自己係「百萬富翁陳啟泰」？阿史雖然唔知陳啟泰果陣係咪真係個百萬富翁，但《百萬富翁》呢個節目絕對可以稱得上係亞視同陳啟泰嘅綜藝節目代表作。

《百萬富翁》係亞洲電視向英國獨立電視台（ITV）購買版權之後製作嘅綜藝節目，遊戲規則好簡單，答啱問題就可以攞到相對應嘅獎金，仲有打電話問朋友、50/50、問現場觀眾一共三個錦囊傍身，真正實踐咗知識就係財富同把握機會嘅重要性。當年亞視收視長期低迷，而自從2001年揼重本推出《百萬富翁》之後，成功挽救收視，最高峰更加以42點嘅收視撼贏TVB嘅《香港小姐競選》，逼到TVB要派DoDo姐主持《一筆Out消》嚟迎戰。

除咗有豐富嘅獎金吸引觀眾去參加、收睇之外，頭四輯嘅主持人陳啟泰，都係《百萬富翁》成為膾炙人口節目嘅原因之一。擁有豐富主持經驗嘅陳啟泰，喺《百萬富翁》入面表現得恰到好處，冷靜、睿智嘅形象深入民心。除咗普通市民有機會上節目挑戰一百萬嘅問題嘅之外，《百萬富翁》仲製作咗特別版，連星爺都曾經代表過電影《少林足球》上過慈善特輯，最後仲成功拎到100萬嚟做善事添。想知道星爺果條100萬嘅問題係咩？去片！

00萬嘅問題係咩？去片！