今個禮拜TVB開始播《大帥哥》，有張衛健回巢助陣，阿史都有睇多兩眼。第一集講到張衛健對蔡思貝「生滋貓入眼」，咁呢句「生滋貓入眼」可能已經無乜後生會講，其實佢同「情人眼裡出西施」意思相似，不過多咗啲貶義。

「生滋貓」指嘅係有皮膚病嘅貓，換言之即係話人外表麻麻唔係咁好睇，「入眼」係指睇得上眼咁解，用嚟形容一個人中意咗一個外貌唔多掂嘅人，對於被睇中嘅人嚟講係個比較負面嘅形容。相反，「情人眼裡出西施」就顯得正面好多，即使對方嘅樣生得平平凡凡，但因為中意對方，都會覺得對方好靚。咦，張衛健班兄弟話張衛健係「生滋貓入眼」，係咪即係明示緊啲嘢？