宜家夜晚播緊嘅電視劇《大帥哥》，有成差唔多22年無返TVB拍劇嘅張衛健助陣，播出前已經令唔少觀眾好期待。想當年，佢扮嘅「花果山水簾洞美猴皇齊天大聖孫悟空」，簡直係無法超越嘅經典。

 張衛健係1984年參加TVB新秀歌唱大賽入行，90年代初同林文龍、陳嘉輝、劉錫明合稱「太陽之子」獲TVB力捧，TVB唔單止俾張衛健擔正出演多部劇集，佢主演嘅劇集好多仲係由佢自己唱返主題曲。不過張衛健嘅演員之路遠比歌手之路暢順，1991年同溫兆倫合作嘅《老友鬼鬼》，成功令張衛健一炮而紅，劇入面嘅口頭禪「咪當我Robert」、「我哋係醒字派嚟㗎嘛」，令觀眾對佢印象深刻。

不過，講到張衛健喺TVB最經典嘅劇集就梗係《西遊記》喇，佢唔單止演活咗「孫悟空」呢個角色，仲留低咗唔少金句：「我係花果山水簾洞美猴皇齊天大聖孫悟空」、「Yo！使乜驚呀」，張衛健仲响《大帥哥》入面同大家重溫返依兩句，真係啲回憶全部返曬嚟。張衛健版嘅《西遊記》當年首集收視就已經有44點，隨後張衛健再參演以《西遊記》為藍本而改編嘅《齊天大聖孫悟空》，再爆金句：「噼啪你個隆的咚啊」、「型到跌渣」，風靡全港，呢啲金句亦成為當年嘅潮語。不過，有人就投訴張衛健果句「噼啪你個隆的咚啊」疑似粗口，有機會教壞細路，張衛健就解釋話呢句嚟自江蘇揚州嘅民謠，唔係粗口。

可惜，自從張衛健因為拍《西遊記》續集嘅片酬同TVB傾唔埋，唔少報道仲話有高層嘲諷佢，如果塊面無馬騮毛嘅話根本就唔值錢，張衛健於是毅然離巢發展。佢其後一直留光頭，用行動證明：只要有料，就拍得到好戲。

圖為《西遊記》劇照。網上圖片