窄衫闊褲、有撮小鬍鬚、篤住枝拐杖，一代默劇笑匠差利卓別靈嘅形象深入民心。演出時幽默惹笑嘅佢，為觀眾帶嚟歡樂同反思，到底現實生活中嘅佢係一個咩人？銀幕前後反差有幾大？

差利1889年於倫敦出世，父母都係賣藝嘅演員。佢細細個已經登台表演啞劇等，備受賞識。21歲嗰年，差利跟住雜技團去美國表演，短短兩年時間已經爆紅。1917年，差利成立電影公司，參與電影嘅製作同演出，包括《摩登時代》、《淘金熱》、《大獨裁者》等，部部膾炙人口。差利嘅作品笑中有淚，好似《摩登時代》描繪工業社會入面工人同窮人嘅遭遇，詼諧嘅外表之下，包裹住甘苦嘅生活挑戰，觸動無數觀眾。

工作時嘅差利同螢幕上嘅佢完全唔同，有關於佢嘅書籍講到，差利係完美主義者，會不斷重覆又重覆咁拍攝同一個鏡頭，好似响《城市之光》入面流浪漢同賣花女買花嘅鏡頭，足足拍咗超過三百次先收貨。

1977年聖誕節，差利於瑞士中風逝世。經歷遺體被盜後尋回嘅一番曲折，最後被覆蓋於水泥之下，傳奇一生落下帷幕。

早幾年，英國軍情五處公開檔案，話當年曾經應FBI要求而嘗試起差利個底，點知出盡法寶都無辦法證明佢究竟係咪响英國出世、出生日期同地點同啱唔啱、差利卓別靈係咪真名等，真係好唔尋常。不過阿史認為，對於差利嘅身世之謎，理應隨著佢嘅離去回歸塵土，留低响大家心目中嘅，應該係佢熒幕中嘅出色表演。唔知大家又點睇呢？

第一張細圖為著名科學家愛恩斯坦同差利合照。網絡圖片