剛過去嘅週末同秘書妹妹去PMQ元創方，順便參觀埋隔離新開嘅新聞博覽館，增廣見聞。博覽館位於必列者士街2號，由三級歷史建築嘅舊街市活化而成。館入面有唔少得意嘢，好似「999機」咁，係當年傳媒界嘅法寶之一。話說突發新聞嘅記者可以利用部機截聽警察「999台」嘅無線電通訊，知道邊度發生大件事就即刻派人採訪，所以亦有「記者快過警察」嘅場面出現。不過導賞團姐姐話，當局早年更換咗通訊系統，所以部機唔再啱用，成為歷史物品喇。

除咗「999機」，館入面仲提到當年嘅報紙準備咗一筆線人費用嚟吸引線人報料，另外亦介紹咗執字粒等印報工序，令大家對報業運作多咗份認識。

話明新聞博覽館，又點可以唔提電視新聞？話說八十年代初電視同電台新聞都係人手寫稿，唔少人仔細一望當年嘅手稿，嘩！啲字好似鬼畫符同打風嘅混合體，當時嘅主播或者報道員要認唔同人嘅字跡，難度分十足。其中一個玻璃櫃擺放咗唔同傳媒嘅咪牌，好似無線、亞視、now等，最特別嘅莫過於佳視嘅咪牌，因為佳視七十年代後期已經執咗笠，導賞團姐姐話館方要問返啲老行家、老前輩隻色究竟係點，落咗唔少功夫先可以還原個咪牌出嚟。

博覽館仲有唔少嘢睇，留待大家自己發掘，最尾留返個小問題過大家，話說依家報紙售價大概7-10蚊份，貴過個普通菠蘿包；而六十年代嘅報紙約1-2毫子一份，平過支裝可樂，問題嚟喇，咁五十年代到底一份報紙定係一個蛋撻貴啲？（先旨聲明，答案嚟自新聞博覽館展覽內容~）