今時今日發生重大新聞，電視台都會採用直播方式，向觀眾報道最新發展。唔講唔知，原來香港第一次電視直播係喺四十幾年前，當時為咗直擊寶生銀行挾持人質事件，無綫破天荒咁直播成20小時，創下紀錄添。

話說單案於1974年5月24日發生，當時有個賊匪挾持11個職員做人質，仲要求兩架車走佬。牽涉超過十條人命，警方嚴陣以待，封咗成條街，並調動大批警員在場戒備。當時有傳媒打咗幾次電話入銀行，個劫匪又真係接聽，講咗自己嘅少少資料同要求。

無綫嘅工作人員去到銀行對面嘅居民，諗住從天台影過去銀行，直播單案嘅最新發展，不過用嚟直播嘅機器非常大嚿，笨重到咩咁，為咗上天台，佢哋甚至要拆咗居民度門，認真大陣仗。响直播期間，警方一度以安全為由加以勸阻，不過你有你勸，佢有佢播，造就咗香港電視新聞嘅一段歷史。

其中幾個被挾持嘅銀行男職員靜雞雞鬆綁，並趁住劫匪聽電話之際齊齊反抗，女職員即刻衝出去求救，警員湧入銀行，最終劫匪被捕，無人喪命。