唔少史友知道，中國第一位到外國留學嘅學生係容閎，佢曾經入讀香港嘅馬禮遜學校。唔講唔知，其實容閎後嚟去美國讀書時，仲有兩位同伴，其中一位就係參與洋務運動嘅首位香港人——黃勝。

黃勝生於澳門，十五歲就到馬禮遜紀念學校讀書，之後同容閎齊齊跟校長鮑留雲去美國讀書，不過佢之後因病回港，去咗《德臣西報》學印刷。後嚟佢做過英華書院印刷所主管，幫手翻譯；又同香港首位華人立法局議員伍廷芳創辦《香港中外新報》，仲做埋主編，可以話响新聞界佔有一席位。

黃勝於1864年應江蘇巡撫李鴻章同江南製造局總辦丁日昌嘅邀請，到上海嘅廣方言館做英文老師，唔單止培養大批學生，仲成為參與香港洋務運動嘅第一人。期間佢幫老友容閎手，帶第二批中國留美幼童出國，返中國之後又到香港，招攬學生到福州船政學堂屬下嘅英國學堂讀書。

除咗洋務運動，黃勝仲係東華三院十三位創辦人之一，於華洋政商界具有一定聲望，佢仲曾經出任中文考試委員會委員同埋首位華人常任定例局議員添，有機會下次再講講。

圖片嚟自網絡。