《魔戒》可以話係20世紀最受歡迎嘅小說之一，亦曾經被拍成系列電影。原來《魔戒》呢套小說係同作者第一次世界大戰嘅經歷有密切關係。

《魔戒》作者係J.R.R. 托爾金（J.R.R. Tolkien），佢1892年生於南非一個英國家庭，1911年佢考入牛津大學古典語言學系。畢業之後無幾耐，托爾金捲入第一次世界大戰當中，被派到前線，參與索姆河戰役，期間目睹無數嘅血腥畫面、震耳欲聾嘅機關槍聲。幾個月之後，托爾金就因為患上戰壕熱病，獲准離開前線回國，佢之後一直留喺醫院直至一戰結束。喺住院期間，佢開始寫作，1937年出版第一部作品《哈比人歷險記》，結果大受歡迎，喺出版社鼓勵下開始創作《魔戒》系列。

喺1950年代中，《魔戒》正式出版，托爾金承認其實書入面摩多城附近地形同埋經過嘅死亡沼澤，都參考咗索姆河戰役嘅情景，而小說入面哈比人詹吉就係源自托爾金喺戰場上認識嘅一個士兵。托爾金話過，無論係中土世界定係現實，都需要小人物嘅勇敢同智慧對抗邪惡。

圖片嚟自網絡。