食飯果陣隔離台有個後生仔將個頭染到五顏六色咁，認真吸睛。食完飯之後，有同事就講返個後生仔，話唔明宜家啲後生諗緊乜，染到個頭鬼五馬六咁，此處省略一千字。

鬼五馬六通常形容人或事古怪，無嚟正經，呢個詞要拆開做「鬼馬」同「五六」嚟解。「鬼馬」本身嘅意思係古靈精怪但又有啲小聰明，而「五六」就嚟自一個說法：以前有人話初一係雞日，初二係狗日，初三係豬日，初四係羊日，初五係牛日，初六就係馬日，所以有啲老人家就會話初一雞日唔好食雞，初二唔好打狗之類嘅說話。根據呢個講法，有啲舊習俗就會喺初五、初六呢兩日去地藏廟拜牛頭馬面，就令「五」、「六」呢兩個數字蒙上一層神秘色彩。於是乎，鬼五馬六就被賦予咗形容人或事荒誕、古怪嘅意思。