大家細個讀書個陣，都會讀過話香港以前係一個漁港，當時唔少居民都係靠捕魚為生。亦因為咁，香港好多習俗都係同海上文化有關，就好似天后崇拜咁，就係其中一個例子。

相傳天后係叫林默娘，本身係福建莆田湄洲嶼人，福建一帶嘅漁民供奉佢，祈求出海時一切順利。後嚟天后崇拜文化傳至各地包括香港，亦成為香港地區漁民其中一個主要供奉對象，而每年天后誕都係漁民聚集地區嘅一件年度大事。

阿史今年「獲邀」參與長洲天后誕其中一項活動，就係護送「阿禡」（讀音為馬，即係天后娘娘）。據邀請阿史去湊熱鬧嘅長洲居民所講，响長洲天后誕嘅正誕，島內唔同嘅團體同組織（包括商會、居民會、體育會、花炮會）都會將佢哋供奉嘅「阿禡」放上神龕，之後就巡遊去長洲西灣嘅天后廟，巡遊隊伍响沿途就會舞獅打鼓。而阿史跟住嘅就係其中一個花炮會嘅隊伍。

去到西灣天后廟附近，由於巡遊隊伍唔少，每古遊行隊伍都要排隊等，等住到大廟同戲棚前上香參拜。按照習俗，一眾「阿禡」响天后誕期間都會到戲棚睇神功戲，呢個戲棚係建於長洲西灣天后廟附近。

大家可能問，天后誕應該係農曆三月廿三，點解長洲係三月十八呢？長洲島內相傳就係話以前去西灣天后廟進香個條路無照明設施，居民摸黑過去天后廟就唔多方便，於是就將賀誕日期提前幾天，因為十八時個月都仲好光，咁居民行去西灣就唔會太黑喇！

每當提起長洲嘅節慶，大家可能會諗起太平清醮，其實天后誕都係島上其中一個重要傳統節日，始終，天后崇拜响華南地區始終係好有影響力。