《上海灘》丁力、《跛豪》主角、《包青天》展昭，依啲觀眾熟悉嘅角色，都係由演員呂良偉飾演。佢近年主要都喺內地拍劇同電影，好少再喺香港拍劇，對上一次拍劇已經係2009年無綫嗰套《富貴門》，即係飾演薛家燕個仔嗰套，阿史記得因為佢只係細過薛家燕6年，當時引起一時熱議。

呂良偉喺1977年無綫藝員訓練班畢業出道，最初係飾演一啲配角，直至1980年佢第一次擔正，就係喺經典劇集《上海灘》入面飾演丁力，亦成為佢嘅代表作，幾乎一諗起丁力就諗起呂良偉。喺1991年周星馳嗰套《賭俠2之上海灘賭聖》入面，呂良偉就再次飾演丁力，可以話角色同演員幾乎係畫上等號。

呂良偉喺電影方面嘅代表作，點可以唔提1991年嘅《跛豪》，佢喺套劇入面飾演主角「跛豪」，電影影射六七十年代香港大毒梟吳錫豪，呂良偉當年為咗拍呢套戲，仲專登增肥40磅，凸出個大肚腩。佢嘅努力都算係得到回報，套戲當年大收3800萬票房，仲贏埋當年香港電影金像獎嘅最佳電影，而呂良偉就獲得最佳男主角提名。

原圖嚟自網絡。