日本7個甲級戰犯東條英機、土肥原賢二、松井石根、武藤章、坂垣征四郎、廣田弘毅同木村兵太郎，喺1948年11月12日被判死刑，同年12月23日凌晨喺東京巢鴨監獄以吊首方式處死，為佢哋喺二戰侵略其他國家時作出嘅暴行付出代價。

東條英機係日本第40任首相，佢曾經發動侵略中國嘅惡行，批准喺中國建立細菌武器實驗基地，發動細菌戰，造成120萬中國人死亡，另外又指示偷襲美國海軍珍珠港基地，發動太平洋戰爭。去到二戰尾聲，日本於1945年8月宣佈無條件投降，同年9月11日，駐日盟軍總司令麥克亞瑟下令拘捕惡名昭著嘅東條英機，當上校克勞斯帶埋班士兵去到東條英機位於東京嘅屋企時，屋內突然傳出幾下槍聲，原來東條英機向心口開槍自殺。

克勞斯將東條英機帶返去搵美軍軍醫醫治，醫生發現東條英機打歪咗，無打中心臟。美軍士兵約翰為東條英機輸血，救返佢。喺3年之後，約翰得知東條英機伏法，揚言好滿意，仲話當初救東條英機，就係為咗令佢接受審判同制裁。東條英機死後，骨灰葬於殉國七士廟，自1978年起，佢同其他13名甲級戰犯被列入靖國神社合祭，因此每次有日本政客拜靖國神社，都會引起被侵略國嘅不滿同抗議。

原圖取自網絡。