「當你見到天上星星，可會想起我」，對娛樂圈嚟講，2018年流過唔少眼淚：靚絕五台山嘅藍潔瑛、「大俠」岳華、電影大亨鄒文懷等今年逝世，一粒粒影星殞落，令觀眾甚為惋惜，今日同大家回顧圈內部份逝世名人。

岳華絕係資深嘅實力派演員，1966年拍《大醉俠》開始出名，之後飾演過《陸小鳳之決戰前後》嘅西門吹雪同埋《浣花洗劍》嘅紫衣侯等，同大俠嘅角色結下不解緣。近年佢仲拍過《珠光寶氣》，飾演富商，而最後一部電影《樹大招風》，佢飾演個仔被綁架嘅富商，同樣入戲。10月同11月嘅噩耗接二連三，岳華之後，藍潔瑛同鄒文懷同樣於11月初逝世，藍潔瑛嘅美貌與演技同樣受注目，《大時代》、《義不容情》、《西遊記》等，套套經典。至於鄒文懷，佢70年代創辦嘉禾電影，一手捧紅傳奇武打巨星李小龍，又為成龍同許冠文等著名演員開戲，可以話係有能力同邵氏分庭抗禮。

一套影視作品嘅成功，唔少得乾草演員嘅貢獻。被喻為「周星馳御用婆婆」，曾經參演《審死官》、《喜劇之王》，又响電影《六樓后座》飾演Suzy嘅資深演員侯煥玲於2月離開大家，通常於電影戲份唔多但好搶鏡嘅佢，又有邊個估到，佢67歲先拍電影？另一位2月離世嘅甘草演員係施介強，佢响《審死官》分別同演員車保羅飾演瘦虎肥龍，令觀眾留低深刻印象。歌手界方面，組合at17嘅盧凱彤跳樓身亡，佢嘅歌聲已成追憶。

2018年有無數名人逝世，為大眾留下歎息同哀愁。响今年即將落下帷幕之際，祝願大家明天/明年會更好！

原圖嚟自網絡。