老夫子、秦先生、大番薯好多人識，甚至可以話係陪伴住港人成長。佢哋嘅出現，要多謝《老夫子》作者王家禧。當年王家禧用囝囝王澤嚟做筆名，憑住簡潔得嚟又幽默嘅情節，加上人物個性鮮明，一直好受歡迎，今日同大家重溫返佢嘅故事。

王家禧1924年於天津出世，爸爸係北洋軍閥王承斌。佢大學時讀西方藝術，1956年移居香港，漸漸展開漫畫創作。到咗六十年代，王家禧開始喺香港嘅報紙雜誌發表《老夫子》，仲出埋一本本嘅漫畫。雖然作品叫做《老夫子》，但首先出場角色嘅係秦先生，用咗「蠢先生」嘅諧音，希望博讀者一笑。而漫畫中老夫子狂追嘅女角色陳小姐，原型其實係王家禧嘅太太陳玲玲。

根據資料，《老夫子》漫畫素材係嚟自王家禧嘅生活，年輕時曾經係樂團鼓手嘅佢，練到左右手腳可以同時做唔同動作嘅技能，之後更加可以兩隻手同時畫畫寫字，依項生活技能同其他片段，讀者都可以响《老夫子》見到。

睇過《老夫子》嘅讀者，都知道王家禧好中意用「耐人尋味」、「禍不單行」做標題，部份內容更加展現社會唔同年代嘅生活面貌，具有濃厚嘅香港特色。而王家禧嘅仔、現實中真正嘅王澤係學建築出身，佢1995年繼承爸爸衣缽，用畫筆將作品延續落去，令《老夫子》真正成為「王澤」出品。

圖片嚟自網絡。