船同飛機經過百慕達三角洲範圍果陣會迷失方向嘅傳聞你哋可能就聽得多，但香港竟然都有個地方係會令指南針失靈？啲村民仲要一夜之間離奇失蹤？究竟發生過啲咩事？

 呢個聲稱會令指南針失效嘅地方，就係新界東北沙頭角嘅鎖羅盤村，喺清代果陣村名係叫「鎖腦盆」，可能係因為七十年代嘅行山人士嘅指南針（羅盤）喺附近頻頻被鎖嘅怪異經歷所以易名。據講，曾經有兩兄弟喺日戰時期返鎖羅盤村慶祝太平清醮嘅時候，入村之後發覺村入面一片死寂，但慶祝嘅祭品、食物全部擺放妥當，無打鬥跡象，連家禽都安然無恙，只有全村嘅男女老幼一齊唔見咗。

而根據《香港奇情》所寫嘅鎖羅盤村嘅故事就更加離奇，話說當時英政府想入鎖羅盤村勘察礦脈，但被村民強烈反對，甚至將英政府送去打好關係嘅50隻燒乳豬全部丟落去一口廢井入面，而怪事亦從此開始。先係村入面嘅多隻家禽唔知被咩咬死；再嚟就到豬同牛慘死，但係連屍體都無，只係剩返一灘血；再後嚟到小朋友失蹤，搵返果陣係咁重複「乳豬」。曾經有專家同工人落個井度睇個究竟，但佢哋由井度翻上嚟之後點都唔肯講喺入面見到嘅嘢。最後，英政府專家宣佈中止開礦計劃，鎖羅盤村亦人去樓空。

對於鎖羅盤村嘅謎題，有人就解釋話，其實係瘟疫令村民一齊搬離，又有人話，村民係被日軍集體屠殺，以至村民「一夜消失」。不過有報道話鎖羅盤村代表曾經忍唔住出面澄清，澄清啲村民只係移民或者搬咗去市區，暗示大家諗太多。根據唔少行山人士話，去鎖羅盤村嘅路並唔似坊間所講咁陰森恐怖，沿路風景宜人，而指南針亦都無失靈。值得留意嘅，反而係因為村落丟空多年，唔少偷渡客同不法份子潛伏喺村內，所以造成村屋布置整齊，甚至仲有飯餸喺枱面嘅情況。

原圖嚟自網絡。