哈佬喂你會諗起咩？扮鬼扮馬？去主題公園玩？阿史會諗起聖羅蘭。羅蘭姐依個主題樂園廣告同角色，相信係繼龍婆之後，最能夠响年輕人心目中留下印象。做戲入型入格嘅羅蘭姐，背後落咗唔少工夫，不斷求變嘅佢，用實際行動證明，欲要成功，必先「練功」。

羅蘭姐原名盧燕英，係有印度血統嘅混血兒。佢16歲去片場睇人拍戲，間唔中會做特約演員，飾演妹仔等角色，之後電影公司老細貪佢鼻高眼大，夠神似，簽咗佢專門做惡人同反派角色。因為羅蘭姐飾演反派入型入格，搞到出街被人鬧，雖然受委屈，但係對佢演技嘅一種肯定。

六十年代起，羅蘭姐拍咗超過一百部電影，去到1971年加入無綫，拍過《狂潮》、《家變》、《網中人》、《親情》等電視劇，扮演過唔少人嘅媽咪、婆婆同嫲嫲。後嚟羅蘭姐重投電影行業，1993年喺電影《七月十四》首次扮演可以通靈嘅龍婆，塑造出一個神怪、靈異嘅角色，更令佢奪得兩屆金像獎最佳女配角提名。之後「龍婆」反覆出現係恐怖片《陰陽路》系列，成為經典角色之一，大受歡迎，唔少人因為咁都叫羅蘭姐做龍婆。
扮似咩嘅羅蘭姐，戲路又點止得鬼鬼怪怪？1983年佢飾演《神雕俠侶》嘅裘千尺，除咗噴粒棗核，佢嘅笑聲同樣令人形象深刻。羅蘭姐講過，當時為咗演活劇本入面「出場有把淒厲笑聲」，佢响外景場地不斷「哈哈哈哈」咁練習，落咗多日苦功，入場拍攝時先可以笑出恐怖感。

去到扮演龍婆，羅蘭姐仍然不斷揣摩求變，佢口中有層次同埋「先淒後厲」嘅笑聲，同樣都係練出嚟。就算到咗今年，羅蘭姐依然諗計改變龍婆嘅演法，希望更進一步，仲話大家有意見不妨講佢知咁話。作為演員或者成功人士，最難得、最值得敬佩嘅係，當你站在頂峰，仍然努力登上另一個巔峰。