常德奪命細菌戰

好多人講過，最殘忍嘅生物，係人類。1941年11月4日，湖南常德响起防空警報，不過日軍並唔係好似之前咁投擲炸彈，反而掟下爛布、穀物同棉絮，而依啲物料，全部都帶有黑死病病毒。

無幾耐，當地賣肉、魚同糧食嘅店鋪多咗好多死老鼠。漸漸，魚檔張老闆一家六口於半個月內身亡，另一魚檔嘅丁老闆，一家十二口於兩日之內死咗十一人，只剩下在外讀書嘅囝囝。常德同周邊嘅桃源縣陸續有人患鼠疫喪命，疫情好快就擴散到一百五十幾條村，超過七千六百人病死，幾萬人中招染病，禍害持續好幾年。

當年未夠十歲嘅張國珍係其中一位受害者，佢兩個細佬當時發高燒，身為哥哥嘅張國珍無能為力，只能眼白白望住細佬抽筋，最後慢慢斷氣。第二日，爸爸將兩個細佬放入籮筐，上面冚住一層衫，因為唔夠位，細細佬隻手仲凸咗出嚟，之後帶去亂葬崗埋葬。至於點解要草草埋葬？因為當時太多人病死，棺材短缺，大家只能用棉被、草蓆等包裹親人遺體，「當時死一個人好似死一隻雞咁平常」。