喺粵語長片年代，如果話「奸人堅」石堅係果個年代嘅奸角代表，咁有「銀壇鐵漢」、「曹探長」之稱嘅曹達華華叔就同石堅啱啱相反，專門飾演正氣嘅大俠或者警察嘅角色。

曹達華喺廣東台山出世，15歲果陣就孤身去上海拍默片《關東大俠》。1935年，曹達華先嚟香港參演電影《山東響馬》，4年後先喺《烈女行》初次擔任主角。40年代末果陣，香港興起一股武俠小說熱潮，唔少電影商爭相開拍武俠片，曹達華因飾演《黃飛鴻正傳》入面嘅梁寬一角而為觀眾熟悉，原本只係諗住拍四集嘅黃飛鴻電影拍到《梁寬歸天》就應該要大結局，但最後由於影迷對華叔嘅喜愛，梁寬無端端要死而復生，受歡迎程度可見一斑。

講到華叔嘅成名作，就梗要提佢喺《如來神掌》裡面飾演嘅龍劍飛，華叔喺劇中所用嘅招式「萬佛朝宗」，到宜家依然會喺武俠作品出現。到後來轉拍時裝片，喺《福星高照》、《夏日福星》等電影專做警察角色，令佢得到「曹探長」嘅昵稱。90年代，由於華叔年事已高，雖然斷斷續續有拍電影、電視劇，但已經開始逐步淡出影壇。

華叔喺事業上收穫甚豐，但佢嘅真實人生就充滿跌宕。盛傳當年佢一度坐擁過過百萬財產，物業更多達半條街，可惜有鋪賭癮，唔單止成日「過大海」，連賽馬、六合彩、打麻雀都啱，最高峰時期輸咗相當於宜家市值10億嘅身家。對於坊間話華叔賭輸人生嘅傳聞，佢霸氣咁話：「人生要經得起考驗，好似我一樣，電影界畀我終身成就獎，證明我對社會有貢獻！」一技傍身，自食其力，過得自己過得人。

原圖嚟自網絡。