位於港島中環紅棉道嘅前政府辦公大樓美利大廈，宜家已經改建成五星級酒店The Murray，並且喺舊年1月正式投入服務。呢幢美利大廈樓高21層，曾經係香港政府一啲重要決策局同部門嘅總部。當然，美利大廈最出名嘅並唔係呢樣，而係發生喺1974年嘅高僧超度事件。

喺60至70年代期間，美利大廈不時傳出鬧鬼傳聞，

唔少公務員都話曾經喺大廈內見到「無頭鬼」；有職員話會喺辦公室裡面聽到奇怪嘅「的的答答」打字機聲；又有傳聞話有職員發現所有打字機一夜之間全部被搬晒落地下；更加有外籍官員「撞鬼」之後嚇到暈咗……種種傳聞搞到大廈內嘅職員個個人心惶惶。港英政府方面雖然未有正面回應有關問題，但當年有傳媒向運輸署查詢：「你哋運輸署係咪有鬼出現？」而當時嘅運輸署發言人嘅回答話：「無證據顯示有鬼，但亦都無證據顯示無鬼！」呢個回應相當吊詭，更加令到成個鬧鬼傳聞撲朔迷離。最後，運輸署為咗令職員安心，用公帑請咗幾十位高僧嚟大廈作法，超度大廈內嘅冤魂同化解佢哋嘅怨氣。呢場用公費做嘅法事，轟動一時，實屬罕見。

隨住2011年美利大廈內嘅政府辦公室全部遷往添馬艦嘅新政府總部大樓之後，美利大廈直至2013年先被九龍倉集團以44億投得，再歷經3年幾翻新成宜家嘅五星級酒店。

原圖嚟自發展局及網上。