李時珍呢個名大家都應該唔陌生，佢係一代名醫，亦都係《本草綱目》嘅作者。同宜家嘅醫生唔同，明朝時期醫者喺社會上嘅地位唔高，所以李時珍本嚟係以高中科舉為目標嘅。

李時珍嘅父親係鄉下小有名氣嘅大夫，但爸爸唔想個囝學醫，於是李時珍自細就攻讀《四書》、《五經》，14歲果陣就中咗秀才。不過連續考幾次都考唔到舉人，李時珍唯有放棄科舉，繼承父業。佢學醫嘅天份好高，好快就成為當地名醫，醫術出名到被楚王召去武昌做家庭醫生，之後仲被舉薦到太醫院任職。

任職太醫期間，李時珍奉旨去山東萊州醫治瘟疫，救咗唔少百姓。明世宗朱厚熜念李時珍勞苦功高，追封佢父親做正五品太醫院院正。有講法話山東一行令李時珍都染上瘟疫，雖然保住條命仔但都五癆七傷，朱厚熜就命佢唔洗當值，邊靜養邊鑽研醫術。李時珍發現歷代本草嘅著作入面，好多藥草嘅名並無統一名稱，且諸多錯漏，例如唔同產地嘅枸杞嗰樣可能差別較大，被誤為幾種唔同的嘅藥；毒藥被錯誤當成「延年益壽」嘅藥物等，於是佢立志重修本草。

為咗寫《本草綱目》，李時珍走遍兩京十三省，將前朝諸家本草所收嘅藥物逐一考證，又補充收納可入藥之物，並捨棄沿襲千年嘅《神農本草經》上、中、下三品分類法，改為將藥物分為水、火、土、金石、蟲、穀等十六部，對後世中醫學研究發展貢獻良多。佢本著作有幾勁？英國生物學家達爾文將《本草綱目》譽為「中國嘅百科全書」，認真犀利！

圖為李時珍及林文龍飾演嘅李時珍，原圖嚟自網絡。