早排就同史友們講到清朝12位皇帝點解就只係得10個牌位，而今次阿史就同大家繼續講下，點解明朝有16位皇帝，但最後只係得十三陵。
有去過北京嘅史友們都知道，當地其中一個必去嘅景點就係十三陵，咁對應返明朝有16位皇帝嚟講，到底係邊3位皇帝缺席呢？首先第一位就當然係明太祖朱元璋，佢建立明朝之時實際首都係設立喺南京，佢在世之時亦都一直未遷都，所以佢為自己選擇嘅陵墓自然就會喺南京，南京紫金山「明孝陵」就係佢嘅陵墓喇！
至於第二位缺席嘅皇帝相信史友們都估到會係建文帝朱允炆，雖然佢係作為朱元璋嘅孫，但喺上位冇耐就因為削藩政策引起燕王朱棣不滿，最終喺「靖難之變」後就下落不明，生死未卜，所以就更加唔會有遺體，更何況係被納入帝陵。
而最後一位缺席嘅皇帝就係明景帝朱祁鈺。朱祁鈺原本只係一位王爺，但就因為明英宗朱祁鎮喺「土木堡之變」被瓦剌太師也先俘虜，朱祁鈺先至被推舉戚新帝。但後來朱祁鎮被放返嚟之後，為咗防止朱祁鎮復辟，朱祁鈺就一直將佢軟禁喺宮中。直至「奪門之變」後，朱祁鈺降為郕王之後不久逝世，朱祁鎮重奪帝位，所以十三陵自然就唔會有朱祁鈺份嘞！
原圖嚟自網絡