今晚9點半開始，TVB又播新劇，繼上一部《大帥哥》請嚟好耐無喺香港拍劇嘅張衛健之後，今次呢部《荷里活有個大老千》亦都請咗一位重量級人馬——鄭則仕嚟坐鎮。

對上一次鄭則仕拍嘅TVB劇已經係2016年嘅《火線下的江湖大佬》，今次新劇佢飾演一個老千，個角色設定都幾有睇頭。唔講唔知，原嚟鄭則仕已經67歲， 喺1976年加入TVB前，佢因為參加電影公司嘅培訓班而入行，不過都係做啲唔起眼嘅角色。直至入咗TVB參演電視劇《狂潮》、《四眼神探》、《流氓皇帝》、《獵鷹》等，鄭則仕先為人所熟悉。佢拍咗幾年電視劇之後，就全心投入到電影當中，唔單止做演員，仲做埋導演同監製。鄭則仕自編自導自演嘅電影《何必有我》，因飾演患有智障嘅「肥貓」一角，令佢獲得香港電影金像獎第五屆嘅最佳男主角。鄭則仕話「肥貓」呢個角色係佢從影以來最鍾意嘅，隨後仲拍咗《何必有我》嘅續集《肥貓流浪記》，同出演亞視嘅「肥貓」系列連續劇。

鄭則仕雖然喺演藝事業上頗有成就，但人生道路並唔係一帆風順，佢1993年同朋友合資開電影公司，結果蝕近2000萬，幾乎要將所有資產賣晒，仲要不斷問人借錢，同埋狂接戲（即使係爛片）嚟還債。喺鄭則仕最艱難嘅時期，天王劉德華向佢伸出援手，唔單止出資幫佢一把，仲請佢做《兄弟》嘅監製嚟助佢度過難關。鄭則仕相當感動，佢講過「人生唔會只有永遠嘅順利，同時唔會有永遠嘅絕路。」樂觀積極嘅態度，可能係唔少人從低處企返起身嘅重要「支柱」。

原圖嚟自網絡。