《食神》入面嗰位試食吃瀨尿牛丸之後「考試100分」嘅高齡學生，大家仲有無記憶？無錯，佢就係八両金。喺90年代開始，佢拍過唔少電影，絕大多數都係出演戲入面嘅醜角。不過阿史對佢最深刻嘅演出唔係《食神》，而係响《古惑仔情義篇之洪興十三妹》入面，佢飾演夜校學生上史sir（鄒凱光飾演）堂學英文嗰幕。

喺戲外，八兩金嘅粗金鏈、冬菇頭，已經成為佢嘅標誌。風光時，八両金炒樓炒股，自稱身家過億。不過喺97年，佢同唔少投資者一樣損手，經濟出現困難，後嚟同太太八両菜更加關係決裂，自此要同仔仔八両仔相依為命。八両金近年講返起當年嘅事，佢話曾經窮到戶口連一千蚊都無，又變埋晒自己所有金器、無工開，有諗過要抱埋個仔結束生命，但最後都係決定振作。低潮時，八兩金將身上剩餘嘅10蚊買咗7個雞尾包，靠食包同飲水喉水捱過咗一星期，等到出糧先解決困境。