唔知大家有無睇過十幾年前嘅港產恐怖片《大頭怪嬰》呢？唔少人睇完套戲都專登走去摩星嶺靈探，真係夠大膽。電影嘅背景源自香港60年代嘅都市傳聞，話說當時有位孕婦生咗一個大頭BB，佢個頭比普通BB足足大成3倍，唔識喊，剩係會發出一啲類似豬嘅叫聲而且力大無窮，更恐怖嘅係，大頭B個頭生滿縐紋同眼睛。個媽媽生咗怪B出嚟無幾耐就死咗，醫生發現位媽媽唔係死於難產，而係因為啲內臟被怪B食晒！大頭怪嬰隨後被港英政府捉去研究，而怪B嘅屍體就葬喺摩星嶺。

其實摩星嶺曾經係港英政府嘅軍事重地，果度嘅白屋係用作關押政治犯嘅地方，有人更曾經聽到裡面傳出慘叫聲同毒打聲。摩星嶺除咗係熱門靈探地點之外，亦係War game勝地。傳聞有班後生仔喺摩星嶺玩War game，其中一個參加者匿埋喺碉堡入面，用夜視鏡觀察周圍環境嘅時候，見到遠處人頭湧湧，啲人仲著住二戰時期嘅日本軍服，但用肉眼望就乜都睇唔到。另一邊廂，有人見到一個「敵軍」就向其開槍掃射，點知啲氣槍子彈竟然可以穿過「敵軍」嘅身體，呢個半透明「敵軍」仲向住佢嘅方向追過嚟！無論傳聞孰真孰假都好，大家無咩事都係唔好夜媽媽上摩星嶺喇，萬一誤中War game嘅流彈都真係幾痛吓。

原圖嚟自網絡。