話說早兩日有同事中咗一筆小橫財請食下午茶，問班同事想食咩，秘書妹妹諗都唔諗就話想食某名牌蛋糕鋪嘅cup cake。阿史聽到眼都突，即刻話佢想食咗人哋隻車咩。

所謂嘅「食咗人隻車」，其實就係用嚟形容人嘅要求過咗火，有啲貪得無厭。呢句俗語嚟自象棋，捉過象棋嘅人都知「車」有幾好用，只要前面無其他棋阻擋，打橫十字行幾多格都得，暢通無阻，可以話係象棋裡面攻擊力、行動力最高嘅棋。如果被對手食咗自己隻「車」，簡直就好似斷咗左右手咁嚴重，所以「食咗人隻車」等於係將人哋隻王牌食咗，都無乜得剩。

至於點解象棋入面嘅「車」讀做「居」？根據日知錄集釋記載，三國時期嘅史學家韋昭提到「車」讀「居」嘅音係自漢以來先有，當「車」讀「居」嘅時候，就係專門用嚟指果啲用嚟乘坐嘅車或者戰車。象棋入面嘅「車」係指戰車，所以就讀做「居」喇。

原圖嚟自網絡。