大部份嘅影視作品都需要有個大奸角嚟襯托，但奸角要扮到入型入格、神憎鬼厭就一啲都唔易，好多演員只係做到一臉惡相，但有「四大惡人之首」稱號嘅何家駒，惡起上嚟簡直由頭到腳都成個衰人咁款。

何家駒最為人所熟悉嘅喺《監獄風雲》裡面扮演囚犯大咪，戲裡面嘅佢成日聯同另外兩個惡人扮演者吳志雄、黄光亮去欺凌其他獄友。大咪乜都係以自己嘅利益行先，最後仲做埋二五仔出賣獄友，壞得最徹底。而何家駒喺《替天行道之殺兄》同《滅門慘案之孽殺》嘅演出直情可以用「喪盡天良」嚟形容，集爛仔、強姦犯、惡霸嘅惡於一身，令人一睇難忘，影壇「四大惡人之首」真係唔係浪得虛名。

除咗做戲叻之外，何家駒入行前仲做過報館編輯同經理人。話說佢曾經去賭錢，3日裡面輸咗2000萬身家，認真大教訓。無幾耐佢入咗娛樂圈，據講早期做過發哥周潤發等紅星嘅經理人。唔單止係咁，何家駒仲有參與編劇同導演工作，相當多才多藝。

可惜，就算戲裡面幾惡都好，何家駒始終惡唔過病魔。佢一直受糖尿病困擾，之後仲患上肺積水，因為抱病為事業拼搏，搞到身體逐漸變差，導致併發症，最後器官衰竭病逝。何家駒一生無兒無女，臨終前無親人陪伴身邊，孤身一人喺伊利沙伯醫院離世，令人唏噓。

原圖嚟自網絡。