上次講到楚原喺上年金像獎拎咗終身成就獎，攞獎果陣仲拖埋太太南紅同孫女出席，場面相當溫馨。楚原同南紅可以話係娛樂圈嘅模範恩愛夫妻，佢哋呢段婚姻已經超過半世紀，感情依然如一。

南紅以前係當紅電影演員，曾經同四哥謝賢拍過44套電影，據講四哥話南紅「唔係佢杯茶」，所以兩人並無傳出緋聞。南紅一直避免同男演員拍拖，驚佢哋「花fit」，之後同當時嘅新晉導演楚原一拍就拍咗7年拖，仲主動提出訂婚。訂婚兩年後，南紅喺美國登台果陣，楚原以長途電話求婚，無幾耐，兩人就拉埋天窗。

當年楚原好忙，每日朝早寫劇本，下晝入片場，半夜先收工。南紅無半句怨言，仲話太太就係要做好本份，將丈夫放喺第一位，俾佢發揮，丈夫成功就等於成個家庭成功。楚原亦講過，自己鍾意南紅嘅原因正正因為佢夠普通，唔追求物質，同自己一樣。

楚原除咗喺金像獎台上大放金句同正能量之外，仲講返當年佢同六嬸方逸華嘅恩怨。由於楚原當年執導嘅部份電影唔賣座，所以就希望拍攝金庸嘅《天龍八部》嚟為邵氏賺返啲錢。點知當演員、佈景、燈光全部安排好晒，準備開拍嘅時候，六嬸方逸華開廠當日就將《天龍八部》個通告撕落嚟，唔俾拍，仲鬧楚原不懂電影。楚原被人話完，當然好失落，但無辦法，六嬸係一個好堅決嘅人，決定咗嘅事好少會反悔，楚原當時唯有出去同咁多位工作人員道歉，後嚟同邵氏嘅合同約滿，楚原就離開咗邵氏。

圖為楚原同南紅嘅結婚相同近照。