幾十年前嘅賀歲片，依家睇一樣咁正。新年翻睇賀歲片，心水之一肯定要數董驃同肥肥沈殿霞主演嘅經典喜劇《富貴逼人》系列，戲入面董驃一家中六合彩，一朝發達、發過豬頭，相信係唔少人嘅新年願望。

除咗《富貴逼人》，同系列仲有《富貴再逼人》、《富貴再三逼人》同《富貴黃金屋》，最後嗰套係獨立故事，同其他幾套唔同。講返第一集嘅《富貴逼人》，套戲喺1987年播，到依家有成32年，主要講驃叔同肥肥飾演嘅兩公婆生咗三個女招弟、來弟同帶弟，齊齊住响公屋。身為一家之煮嘅驃嬸有日中咗六合彩頭獎，點知遇上銀行出事、個女被綁架等連串起落，令人思考應對得失嘅態度，加上班演員做得過癮又盞鬼，令電影當時大收3,000萬票房，風頭一時無兩。

戲裡戲外，肥姐同驃叔感情一樣咁好。原來首次合作，即係拍《富貴逼人》嗰時，肥姐正陀住欣宜。去到欣宜一歲，肥姐擺咗圍酒席，等欣宜上契過董驃。《富貴逼人》之後，肥姐同驃叔做過差唔多成十次夫婦，可以話係熟悉嘅老拍檔。

原圖嚟自網絡。