早幾日講過警察撞鬼撞到要辭職嘅故事，有史友就提到油麻地茶餐廳送外賣，因為收到陰司紙而報警上報嘅新聞，呢單嘢都好經典，阿史一於今日同大家講講。
話說幾十年前嘅一日，油麻地有間茶餐廳接到外賣電話，話要兩個乾炒牛河同兩個叉燒飯。於是夥記包好外賣就送上去喇，點知喺出面又撳門鐘又敲門咁，等咗好耐都唔見有人嚟開門。卒之，道門開咗一條罅，攝咗啲錢出嚟，仲叫夥記將外賣擺喺門口就走得。夥記雖然覺得好奇怪，但收咗錢、完成任務就走。夜晚茶餐廳老闆埋數果陣，竟然响啲錢入面發現有陰司紙！當時老闆以為係某個夥記嘅惡作劇，問咗一班夥記，大家都耍手擰頭話唔知咩事，最後不了了之。
點知第二日，老闆收鋪之後又見到陰司紙，今次真係堅嬲，捉住班夥記又問多次。有個夥記先記起連續兩日有家人叫一模一樣嘅外賣，又係唔露面齋叫夥記將啲外賣放喺門口，喺門罅塞啲錢出嚟。老闆話如果再接到呢個單位嘅外賣電話，就等佢親自去送。第三日，茶餐廳又接到果個奇怪單位嘅外賣電話，照舊order兩個乾炒牛河同兩個叉燒飯。老闆忍唔住親自出馬，今次呢家人同前兩日一樣都係見唔到樣，但老闆即場驗明啲錢係港紙先走，仲將呢啲錢同其他錢分開擺。奇怪嘅事再次發生，夜晚老闆數錢果陣，見到單獨放出嚟、日頭仲係港紙嘅錢變咗做陰司紙，當堂嚇到呆咗，越諗越覺得心寒，於是報警。
警方接到報案，即刻派人上門調查，撳門鐘，門鐘係壞嘅，拍門，又無人應，於是請嚟消防破門。門一開，竟然發現四具屍體橫臥喺地板。後嚟法醫發現，呢一家四口起碼死咗超過一個星期，而佢哋胃裡面嘅食物殘渣正正就係呢兩日叫嘅乾炒牛河同叉燒飯。附近嘅鄰居都唔知嗰家人死咗，因為前幾日晚晚都聽到裡面有人打麻將，仲傳出好嘈嘅洗牌聲……
原圖嚟自網絡。