就嚟到新年，阿史身邊好多朋友都要趁農曆新年前搞掂晒啲嘢，所以最近都頻頻OT，狂呻自己「做到隻積咁嘅樣」。

「做到隻積咁嘅樣」出自歌神許冠傑嘅經典名曲《半斤八兩》，形容做嘢做到好辛苦咁解。究竟入面個「積」字係咩意思？唔知大家有無聽過「千斤頂」（Jack）呢個工具？佢係車房工人用嚟將車「積」起嚟換車呔嘅工具，由於Jack承受嘅壓力比佢本身嘅重量高得多，用嚟比喻打工仔要頂住上司巨大嘅壓力、做過量嘅工作等情況真係好貼切。

另有人話，「積」字嚟自啤牌嘅「Jack」，係指僕人、雜工，「做到隻『積』咁」即係形容做嘢辛苦到好似做阿四咁。不過，負責填詞嘅許冠傑同黎彼得其實都無正式解釋過個「積」字，上述兩種說法都係大家根據歌詞嘅前文後理解出嚟嘅。

原圖嚟自網絡。