近排睇《愛‧回家》，見到大小姐真係做得好入型入格，抵佢早排攞獎。講開TVB處境劇，梗係要提提由95年播到99年，足足播咗1128集嘅《真情》。歌手李樂詩唱嘅主題曲《無悔愛你一生》當時播到街知巷聞，「笑聲笑聲，滿載溫馨，快樂發心內」，70、80後嘅史友唔好話你未聽過呀。

《愛‧回家》嘅爸爸劉丹有處境劇之王稱號，絕對名副其實。佢喺《真情》入面係擔正做男主角叉燒炳，雖然個角色間唔中有啲小氣，但責任感強，係個標準嘅好爸爸、好老公。劉丹自己都話拍咗咁多齣處境劇，最深刻就係做叉燒炳。套劇仲有李司棋飾演嘅善姨、蔣志光扮嘅添福、馬蹄露版嘅May May、苑瓊丹飾演嘅余瓊等，角色個個經典，仲有「奸人」鄭子誠添，絕對係一眾70、80後嘅集體回憶。

講到阿史最深刻劇情，要數係蘇玉華扮演嘅詠琴因為仔仔肝硬化，捐出部份肝臟俾仔仔，最後出現併發症而身亡。雖然阿史明白，劇集有機會因為演員檔期問題而安排角色死亡，但作為一套行溫馨路線嘅處境劇，阿史真係有啲接受唔到。

唔講唔記得，原來《真情》播出初期嘅收視並唔理想，直至後嚟有薛家燕飾演嘅好姨、羅霖飾演嘅雙雙等新角色加入，收視先逐漸上升。為咗同隔離亞視嘅台慶節目對撼，《真情》入面有幾十集嘅播出時間延長至45分鐘。劉丹話，果陣一班演員每星期要拍5集45分鐘嘅劇情，都好辛苦，但係好開心、好值得，因為佢哋嘅努力無白費，成功撼贏亞視。

原圖嚟自網絡。