近排睇返87年嘅電影《倩女幽魂》，除咗主角女神王祖賢同埋哥哥張國榮之外，飾演燕赤霞嘅午馬都係一個大亮點。可能大家對午馬嘅印象都係源自《倩女幽魂》，戲裡面嘅佢法力高強又正直，午馬仲憑呢套戲攞到第24屆金馬獎最佳男配角，成就經典嘅燕赤霞。唔講唔知，原來午馬唔止喺哥哥版嘅兩套《倩女幽魂》扮過燕赤霞，佢喺洪金寶監製嘅《畫中仙》、高志森執導嘅《鬼賭鬼》入面都真真假假有做過燕赤霞一角，可以話係燕赤霞嘅「御用演員」。

午馬原名馮宏源，喺天津出世，十幾歲果陣移居香港，原本係話劇演員，喺1963年由邵氏影業公司南國實驗劇團畢業，同期畢業嘅仲有知名武打演員羅烈。1965年，午馬出演由張徹、袁秋楓導演嘅《花木蘭》而成名。除咗演出之外，午馬仲有執導，得到大導演張徹、胡金銓等提攜。1970年，午馬喺張徹執導嘅《遊俠兒》、《鷹王》中擔任助理導演，同年就已經可以獨立執導《怒劍狂刀》。

雖然午馬喺大部份嘅戲入面都係飾演配角，例如《笑傲江湖》嘅劉正風，但佢敬業、唔大牌，從來唔遲到，仲對後輩非常客氣，令佢喺圈內嘅人緣極佳。午馬2013年患上肺癌，但堅持喺剩低嘅日子裡面享受工作同生活，繼續拍電影同劇集，瀟灑咁走埋人生最後一段路。2014年2月，午馬喺屋企離世。

圖為午馬飾演嘅燕赤霞同劉正風，原圖嚟自網絡。