周星馳拍咗套《新喜劇之王》喺今年賀歲片檔期上映，不過阿史就無睇，睇咗嘅史友記得分享吓。雖然阿史就無睇《新喜劇之王》，但舊嗰套都有趁新年搵返出嚟睇，原來舊嗰套已經啱啱好上映咗20年，時間過得真係快！

周星馳喺《喜劇之王》入面飾演一個成日著住套西裝、對演戲非常之認真嘅臨時演員尹天仇，認真到導演未嗌cut就算被火燒都繼續演落去，佢又拋唔少俄國戲劇理論大師史坦尼斯拉夫斯基嘅理論，教人做戲，非常搞笑。當年得18歲嘅張栢芝就因為呢套戲而爆紅，劇入面嘅佢可以話係非常青春。20年後，張栢芝為《新喜劇之王》配音，都算係幾有意思！

其實套戲劇仲有段小插曲，就係原本做臥底嘅場務並非吳孟達，而係另一位有份量嘅演員萬梓良。話說當時萬梓良响內地有生意，所以香港開工時，每次都要前一晚落實。其中有晚拍夜咗，劇組更改時間，上晝嘅戲份變下晝拍。當時製片透過酒店同萬梓良講，點知萬梓良嗰日無返酒店，出咗去應酬，之後直接去咗片場，當然得個吉，一個人都無。雖然係個誤會，但當事人點都會嬲嬲豬，主力參與製作嘅田雞田啟文要負責「拆彈」，當佢就行到星爺同萬梓良前面時，突然棘到隻腳，跪低咗。萬梓良當堂嚇咗一跳，田啟文趁機解釋，最後相安無事。

咁點解最後都係變咗吳孟達？原來萬梓良之前講好幾時要拍完，因為佢趕住去外地，做侄女嘅做主婚人，點知套戲不斷延期，搞搞吓只能無奈換角，不過報道話星爺同萬梓良傾掂數，大家都無怪對方。而吳孟達响外地拍完戲，立即趕返香港，做義氣仔女頂上，做就套戲嘅經典角色。

原圖取自網絡。