有「水餃皇后」之稱嘅灣仔碼頭水餃創辦人臧健和逝世，令人惋惜。雖然舊年已經講過臧健和嘅故事，不過今日再講多少少，同大家重溫依位商界女強人自強不息嘅傳奇。

之前提過，臧健和本身係青島人，後尾嫁咗嗰泰國老公，生咗兩個女，點知老公返咗泰國之後另娶他人繼後香燈，仲生埋個囝，搞到臧健和兩個囡被輕視。臧健和決心離婚，到香港自食其力，做過洗電車、酒樓、私家看護等等。七十年代後期，佢用500蚊創業，開始响灣仔碼頭擺檔，賣拿手嘅家鄉風味水餃。

臧健和為咗整出適合香港人口味嘅水餃，不斷減少肥豬肉嘅比例，仲將棉胎咁厚嘅餃子皮改良咗，漸漸打響名堂。做生意唔會永遠都一帆風順，報道話有次臧健和嗰女幫手睇水，一見到警察就通知媽媽走鬼，點知囡囡畀隻狗仔吸引住，掛住玩，搞到臧健和當場被捉。闖禍嘅囡囡當場大喊，「係我貪玩，你放咗我媽媽」。

去到1983年，臧健和開設山寨工場，做批發生意，後嚟佢得到日資百貨公司老闆嘅賞識，令灣仔碼頭水餃喺數百間超市上架，迅速成為香港冷凍食品嘅第一品牌。 

1998年，灣仔碼頭水餃獲美國最大嘅急凍食品企業Pillsbury入股，注資6000萬美元，喺內地興建生產廠房。自此，灣仔碼頭水餃牌子賣到成巷成市，更逐步發展成為價值50億嘅國際品牌。依家品牌成為內地十大城市最暢銷嘅急凍麵點品牌，每年生意額有成15億元人民幣，累積生產咗超過200億隻水餃，認真威水。

圖片嚟自網絡。