早幾日放假，想出門口散下心，於是就去咗位於九龍深水埗石硤尾邨嘅美荷樓。美荷樓係一座被活化嘅徙置大廈，亦係政府上世紀五十年代用來嚟安置石峽尾木屋區大火災民嘅公共房屋。過咗幾十年後石硤尾邨各座舊型大廈陸續清拆重建，唯獨第41座美荷樓獲保留同活化，成為二級歷史建築。

呢排天氣炎熱，從深水埗行到去美荷樓已經濕晒，入去見到一間富有香港情懷色彩而又相當乾淨嘅冰室，抖抖歇歇先。之後就去咗位於地面同一樓嘅「美荷樓生活館」參觀，可以見到好多由50年代至80年代嘅傢俬擺設，唔少仲係阿史細個個陣曾經响阿爺同阿公兩個屋企見過嘅家電，例如一個綠色矮小嘅電冰箱，當年就俾阿史玩到壞咗；又好似花樽、痰罐同埋相當巨型嘅火水爐等，見到呢啲「退役」生活用品，瞬間勾起不少兒時回憶。始終，依家嘅公屋同舊式公屋差好遠。

另外，一個用石牆建成嘅簡陋女廁又係令人印象深刻。話說當時香港人生活質素好差，各家各戶要同用廁所，呢啲都係依家嘅人好難想象到。相比之下，更深感現有的生活已相當優越，實在值得感恩。同樣，當時唔少香港人都係住响木屋裡面，能夠上到樓仲要有咁嘅廁所用已經係好好嘅生活條件，相對而言。

對香港人嚟講，美荷樓唔單只係一幢上個世紀嘅屋邨舊樓，對於有番咁上下年紀嘅香港人而言，係回憶嘅根源。