之前講起樂壇女子組合花生女郎，今日一於同大家介紹另一隊——英皇娛樂嘅3T。唔知史友仲有無印象呢？一提起3T，阿史就剩係諗到同跑馬有關，3T呢個組合由鄭希怡（Yumiko）、蔣雅文（Mandy）同劉思惠（Maggie）三個人組成，阿史就覺得奇怪喇，明明3個人個名都無個T字，點解又會叫3T呢？

話說嗰組合名原來真係同賭馬有關！當時英皇諗住馬迷興賭3T，於是就索性幫呢個組合改個名叫3T，之後英皇幫3T出咗張專輯叫《少女蝶》試下外界反應，睇下邊個最受歡迎，再去力捧，最終鄭希怡同蔣雅文就成為英皇嘅力捧對象。事隔多年，而家得返鄭希怡仲留喺娛樂圈，蔣雅文2014年同台灣男朋友結婚，自此落地生根，喺台灣嗰邊生活、開鋪頭。而劉思惠都已經嫁咗，老公係圈外人Jason，仲生埋囝囝添。

原圖取自網絡。