除咗《富貴逼人》、《家有囍事》系列等，經典嘅賀歲片仲有八十年代嘅賣座電影《最佳拍檔》，套戲由光頭佬麥嘉同KingKong許冠傑聯手，加埋差婆張艾嘉擔正，當年大收兩千幾萬票房，最威水嘅係，套戲吸引咗超過210萬觀眾入場，係香港最高入場人次紀錄嘅電影，由1982年播映至今，37年依然未逢敵手，成為紀錄保持者。

1982年嘅《最佳拍檔》用咗唔少007占士邦式嘅橋段，仲大玩「高科技」，好似遙控車放炸彈、踩鋼線行過兩棟樓、跳過行駛中嘅汽車等，情節搞笑之餘又帶到新鮮感畀觀眾。其實「最佳拍檔」一開始並唔係麥嘉同許冠傑，佢哋最開頭諗住搵發哥周潤發做主角，點知發哥唔得閒，製作小組成員之一嘅徐克提議搵許冠傑，對方開價二百萬片酬，當時係天文數字。不過麥嘉樂觀咁諗，其中五十萬當係宣傳公司新藝城，五十萬宣傳許冠傑加盟新藝城拍《最佳拍檔》，咁許冠傑片酬只係一百萬，當堂覺得好抵，先造就出經典角色。

至於女主角差婆嘅演員，原本諗住搵葉德嫻，點知又係唔成事，最後老闆之一嘅石天話搵張艾嘉，最後出嚟嘅效果好好，麥嘉曾經講笑咁話，「行起運上嚟，亂搵都啱！」

當年套戲票房勁收2700萬，係香港第一部票房破二千萬嘅電影，後嚟同系列嘅《大顯神通》、《女皇密令》、《千里救差婆》等，套套都收成兩三千萬。有幾犀利？對比返當年太古城單位賣大概五六十萬，就可想而知。

原圖嚟自網絡。