用子彈迎接港督咁大膽？話說喺1912年7月4日，做過香港警察隊長嘅梅含理爵士返到香港出任第15任總督，佢喺卜公碼頭上岸之後，同佢妻子同埋女兒坐轎去大會堂出席就職典禮。喺途中，突然有個著西裝嘅華人青年李漢雄，喺人群中拎住支槍衝出嚟，並指向梅含理個頭，但旁邊嘅印警反應快，將李漢雄揸槍嘅手臂推開，槍聲一響，打中咗梅含理夫人頂轎個頂，其他警察就衝出嚟制服李漢雄。

李漢雄被捕之後招認咗三個行兇原因，包括佢爸爸做警察嘅時候，因為接受廣州官方嘅金錢同任務，被時任香港警察總監梅含理革職同判坐監，第二個原因就係梅含理出任斐濟總督嘅時候，曾經歧視同虐待華人，最後就係李漢雄不滿梅含理禁止廣東錢幣喺香港流通。除此之外，梅含理喺香港做警察嘅時候，曾經同唔少香港人發生衝突，包括英國接管新界嘅時候，佢率領英兵攻入大埔等，搞到得罪唔少香港華人，所以佢並唔受歡迎。 刺殺事件後，港督就無再坐轎，改坐汽車，一嚟夠快，二嚟畢竟係金屬車身，安全啲。