講到大陸從八十年代响嘅改革開放，通常會聚焦當時嘅廣東，阿史今日就介紹兩個人嘅事蹟，就係任仲夷同梁靈光。中央決定咗搞改革開放，廣東省就係先頭部隊，最初係由楊尚昆同習仲勛主持工作。不過佢哋無幾耐就調咗去中央，北京個邊就搵咗任仲夷同梁靈光去廣東搞改革開放。任仲夷係當時黨內嘅開明派，本來係遼寧省委第一書記。最初佢係想將大連市成為特區，不過鄧小平就調去廣東搞改革。而梁靈光本來係國家輕工業部部長，因為做得唔錯就被調去廣東做省委書記同廣州市長。

佢兩個雖然有改革決心，但八十年代初要搞好廣東經濟真係問題多多。好似响改革開放之下，計劃經濟同市場經濟點樣接軌又係一大問題。當時任仲夷就响廣東就逐步開放物價，刺激人民物資流動同對生活需求嘅積極性，等廣東走向市場經濟。另外，點樣吸引港資僑資去廣東投資又係一個大問題，所以當時廣東省政府就推出咗好多優惠政策俾港資僑資。好似廣州市嘅中國大酒店，梁靈光俾咗投資港商多5年嘅合作期，從15年延長至20年，提高等港商投資廣東嘅信心。另外，當時廣東省政府要深圳搞華僑城，於是就由香港中旅集團開發（當時梁靈光係中旅董事長），吸引港澳僑胞嘅資金，最終華僑城成為八九十年代一個中國改革開放成功嘅標誌之一。

佢兩個主政廣東到1985年，為廣東經濟改革創咗好多先河，所以有人就話，鄧小平提出改革開放，任仲夷同梁靈光就係實現個想法嘅其中嘅兩個人。之不過，當時廣東改革開放雖然有成績，但省內就有唔少社會問題，有個傳聞就話當時中共一啲保守派因呢樣嘢對任仲夷不滿，令佢入唔到中央政治局。