之前阿史都介紹咗唔少深圳響成為經濟特區初期出現嘅賓館酒店，當中唔少史友都話以前住過，而呢一間唔單止有返咁上下歷史，而且仲被譽為「深圳坐標原點」，佢就係上海賓館喇！
位於深圳福田區深南中路嘅上海賓館，響1985年開業。呢間賓館係由深圳中航集團、上海石化、香港深業集團共同投資，內部裝修為老上海風格，最初叫中航賓館，後來時任市領導怕中航兩個字唔批，所以改名為上海賓館。而响八十年代，深圳都無幾棟高樓，所以有十一層樓高嘅上海賓館就成為深圳市西邊第一高樓，從西邊入城都會先見到佢，只要經過上海賓館往東，就代表咗「入城」，而賓館西面就算係市郊，所以上海賓館就被譽為「深圳坐標原點」。而呢個八十年代咁有代表性嘅地標，載滿深圳人改革開放嘅回憶，所以响2017年，深圳市頒布「十大歷史建築」，上海賓館就排名首位。
原圖嚟自網絡